1.2.3.4.5


UNA SERA CI INCONTRAMMO

NA SIRA NCI NCONTRAMMU
SUTTA 'LLUMBRA DE 'NNALBERU DE CULUMMU,
TIE TANTA BEDDRA, E IEU CU 'LLU SCIUMMU…
QUISTA E' LA STORIA D'AMORE SBOCCIATA
TRA LU NSINU E LA VATA…
LU NSINU E' BRUTTICEDDRU, MA E' RRICCU
E TENE OLTRE CENTU PEDI DE ULIA ALLA MASSARIA CRANNE,
A VATA TENE I CAPIDDRI BIONDI, LI DENTI NIURI
E NA BEDDRA DOTA, CU OLTRE SESSANTA PARE DE MUTANNE
SE CANUSCIANE DE QUANNU ERANE CARUSEDDRI
PERCE' SE TRUVAVANE SEMPRE ALLU TABBACCU,
LU NSINU, LU CUCCIAVA PE LA TRAMUNTANA
E LA VATA LU SPOIJCAVA QUANNU GGIRAVA SCIROCCU.
POI SE NCUMINCIAVANE A FARE CRANNI
E SE VIDIANE SEMPRE LU DUMINICA A MMISSA
E LU LUNIDIA ALLA PROCISSIONE
E LU CORE GIA' LI ARDIA DE PASSIONE…
PERO' DE STI SINCERI SENTIMENTI
LI GENITORI NUNN'ERANE CUTTENTI
E CUSI' NU BEDDRU GIURNU DE STATE
ORMAI STUFFI DE LE SOLITE SUNATE,
DE 'MMANE MPRIMU, QUANNU TUTTI SE N'ERANE SCIUTI,
CITTI, CITTI…
SE NE SU FUSCIUTI.
S'HANNU PIJATA LA BICICLETTA VECCHIA DE U TATA
TUTTA SCONFIA E SCASCIATA,
CA NON CI MANCU MUTU CAMINA
E SE NO STAI NCORTU OGNE TANTU SCAPPA PURU A CATINA.
PEDALA 'MMIE E PEDALA 'TTIE
LU NSINU S'ERA MISU DE RETA E LA VATA DE NANZI
PEDALA 'MMIE PEDALA 'TTIE
E PEDALA 'MMIE E PEDALA 'TTIE
QUANNU LA VATA STRACCAVA CU STAJE 'NNANZI, QUETA QUETA…
LU NSINU, FACIA CU PASSA DE RETA.
E PEDALA 'MMIE PEDALA 'TTIE
PASSANNU FRA LI MUNTI, LE COTE E LE PIRAZZE,
SANNU FATTU NU BEDDRU VIAGGIU DE NOZZE…
FINCHE' SU RRIVATI ALLA CASEDDRA DE LU NSINU,
SANNU SCUCCHIATU NN'ANGULU ALLU LARGU
E SE NE SU SCIUTI TRE MISI IN LETARGU…
SE LI VIDI MOI STANNU TANTU BEDDRI
PURU CA ORAMAI SANNU FATTI VECCHIAREDDRI,
TENUNE OTTU FIJI
E TIRANE 'NNANZI POVAREDDRI MA CUTTENTI,
LU NSINU E' TUTTU SPINNATU E LA VATA HA PERSI I DENTI.


Luigi Stincone